Innlent | mbl | 14.2.2019 | 13:04 | Uppfært 14:06

Mannvit hlýtur jafnlaunavottun

Hildur Þórisdóttir, mannauðsstjóri Mannvits, og Örn Guðmundsson, forstjóri Mannvits, taka á móti jafnlaunavottuninni frá Árna H. Kristinssyni, framkvæmdastjóra BSI á Íslandi. Ljósmynd/Aðsend

Mannvit hefur hlotið jafnlaunavottun samkvæmt jafnlaunastaðlinum ÍST 85:2012 og heimild Jafnréttisstofu til að nota jafnlaunamerki velferðarráðuneytisins.

Innleiðing jafnlaunakerfis er hluti af jafnréttisáætlun Mannvits, að því er segir í tilkynningu.

Mikilvægum áfanga er náð með þessu skrefi að sögn Hildar Þórisdóttur mannauðsstjóra. „Mannvit hefur sett sér skýra stefnu og metnaðarfull markmið tengd jafnréttismálum og innleiðingu jafnlaunakerfis. Vottunin er því afar ánægjulegur áfangi. Það er mikilvægt fyrir starfsfólk að vita að til staðar sé stjórnkerfi sem tryggi að launaákvarðanir byggist á málefnalegum sjónarmiðum og feli ekki í sér mismunun vegna kyns,“ segir Hildur í tilkynningunni.

BSI á Íslandi framkvæmdi úttektina en starfsemi Mannvits er einnig vottuð samkvæmt alþjóðlega gæðastjórnunarstaðlinum ISO 9001, umhverfisstjórnunarstaðlinum ISO 14001 og öryggisstjórnunarstaðlinum OHSAS 18001.