Fimm ungliðahreyfingar stjórnmálaflokka stóðu fyrir mótmælum við ráðherrabústaðinn í dag í tengslum við komu Mike Pompeo, utanríkisráðherra Bandaríkjanna, hingað til lands. Pompeo og Katrín Jakobsdóttir forsætisráðherra funduðu í ráðherrabústaðnum eftir hádegi.
Þó nokkur fjöldi mætti og skoraði á íslensk stjórnvöld að þrýsta á Pompeo að beita sér fyrir því að mannréttindabrot gegn börnum á suðurlandamærum þarlendis verði stöðvuð.
Í tilkynningu frá ungliðahreyfingunum segir að lítill fyrirvari hafi verið á mótmælunum þar sem stjórnvöld gátu ekki gefið út stað né stund fundarins fyrr en 90 mínútum áður. „Það er til marks um alvarleika mannréttindabrotanna hve fljótt var hægt að safna í stóran hóp mótmælenda,“ segir í tilkynningu.
Ung vinstri græn, Ungir jafnaðarmenn, Ungir píratar, ungir meðlimir Sósíalistaflokksins og Uppreisn - ungliðahreyfing Viðreisnar, stóðu að mótmælunum en öllum ungliðahreyfingum stjórnmálaflokkanna var boðið að taka þátt. Þá segir í tilkynningu að mótmælin sjálf hafi verið óflokksbundin, þverpólitísk og var öllum boðið sem hafa áhuga á því að mannréttindi barna séu virt.