Hamingja á heimsvísu. Þó að úti hamist stríð um hagsmuni er mannsandinn samur við sig. Ástar er þörf!
Ástin hefur verið áberandi þema í fréttamyndum AFP síðustu daga. Valentínusardagurinn var 14. febrúar en siðvenja þess dags er að senda sínum mótleikara í lífinu gjafir eins og blóm og konfekt og láta fylgja með kort hvar skrifaðar eru allskonar játningar um tryggð og taumlausa hamingju.
Sterk hefð er fyrir Valentínusardeginum til dæmis í Bretlandi, Frakklandi og Bandaríkjunum en mörgum þykir raunar sem bandarísk áhrif setji óþarflega sterkan svip á daginn og góðan boðskap hans. Að minnsta kosti seljast hinar fegurstu rósir vel á þessum degi, því það að tjá ást sína með blómum er jafnan sterkur leikur.