Tvö snjóflóð féllu með stuttu millibili yfir þjóðveginn við Sauðanes milli Dalvíkur og Ólafsfjarðar um hádegisbil.
„Fyrra flóðið var býsna stórt, um tuttugu metra breitt yfir veginn og fjórir metrar að hæð,“ segir Páll Kristjánsson, verkstjóri hjá Vegagerðinni á Akureyri, í samtali við mbl.is. Seinna flóðið féll sömuleiðis yfir veginn, talsvert norðar, og var mun minna.
Samkvæmt upplýsingum frá ofanflóðavakt Veðurstofunnar var um þurrt flekahlaup að ræða og flokkast það sem 3 að stærð.
Engan sakaði í flóðinu enda lýsti Vegagerðin yfir hættustigi í Ólafsfjarðarmúla klukkan 22 í gærkvöldi og er vegurinn lokaður.
Mokstur á veginum er fyrirhugaður fljótlega og býst Páll við að vegurinn verði opnaður innan tveggja tíma.