Fær ekki lögheimili skráð á Íslandi

Erna Reka ásamt móður sinni Nazife við dómsuppkvaðningu í dag. ...
Erna Reka ásamt móður sinni Nazife við dómsuppkvaðningu í dag. Jón Þór Ólafsson, þingmaður Pírata, var einnig viðstaddur í Héraðsdómi Reykjavíkur í morgun vegna málsins. mbl.is/Erla

Kröfu albanskra foreldra um að fella úr gildi úrskurð Útlendingastofnunar þess efnis að vísa 22 mánaða gamalli dóttur þeirra úr landi var hafnað í Héraðsdómi Reykjavíkur í dag. Erna Reka fæddist á Íslandi í apríl 2017 en samkvæmt niðurstöðu héraðsdóms fær hún ekki lögheimili skráð á Íslandi í Þjóðskrá Íslands. 

For­eldr­ar Ernu, þau Nazi­fe og Er­i­on, sóttu um hæli á Íslandi 2015 og fengu at­vinnu­leyfi en var svo vísað úr landi. Skömmu síðar komu þau aft­ur til lands­ins og sóttu um dval­ar­leyfi. Um­sókn þeirra var hafnað og niðurstaðan samþykkt af kær­u­nefnd út­lend­inga­mála.

Niðurstaða héraðsdóms í dag þýðir að Ernu verður að öllu óbreyttu vísað úr landi. Lögmenn Ernu og foreldrar hennar munu fara yfir næstu skref í dag. Stefnendur geta vísað málinu til Landsréttar en óvíst er hvort það verði gert. 

Dóms­málið var höfðað með þeim rök­um að í 102. grein út­lend­ingalaga segi að óheim­ilt sé að vísa Íslend­ingi úr landi hafi hann átt hér fasta bú­setu frá fæðingu sam­kvæmt þjóðskrá, en lög­heim­ili barna hæl­is­leit­enda og þeirra sem sótt hafa um dval­ar­leyfi eru skráð með öðrum hætti. Þá telja for­eldr­ar Ernu að mis­mun­andi skrán­ing lög­heim­ila barna sé brot á Barna­sátt­mála Sam­einuðu þjóðanna, þar sem óheim­ilt sé að mis­muna börn­um á grund­velli stöðu for­eldra þeirra.

Aðstandendur og vinir Ernu og fjölskyldu standa fyrir undirskriftasöfnun þar sem þess er krafist að Erna fái að njóta réttlátrar málsmeðferðar. 

Fréttin hefur verið uppfærð

 

mbl.is