Mikill viðbúnaður var hjá slökkviliðinu á höfuðborgarsvæðinu er tilkynnt var um eld á sjöundu hæð í fjölbýlishúsi við Engihjalla nú undir kvöld. Voru bílar sendir á staðinn frá öllum stöðvum en mikinn reyk lagði um stigaganginn.
Þegar fyrsti bíll kom á staðinn gátu slökkviliðsmenn hins vegar greint frá því að reykurinn kom frá potti á eldavél sem í voru brenndir pelar. Pelarnir höfðu gleymst á heitri hellunni, en enginn var heima er atvikið kom upp.
Að sögn sjónarvottar voru tveir dælubílar og að minnsta kosti þrír sjúkrabílar á staðnum um tíma. Ekki kom hins vegar til þess að flytja þurfti neinn af vettvangi með reykeitrun að sögn varðstjóra.
Skemmdir eru þá sagðar vera minni háttar, en unnið er að því að reykræsta húsið.