„Við erum langöflugasti miðillinn sem miðlar upplýsingum um veður og færð til erlendra ferðamanna á landinu í dag,“ segir Jónas Guðmundsson, hjá Slysavarnafélaginu Landsbjörg (SL), um vefinn Safetravel.is.
Þar er miðlað viðvörunum og upplýsingum um ástand á vinsælum viðkomustöðum til ferðamanna á íslensku, ensku, frönsku, þýsku og kínversku. Einnig getur fólk lagt þar inn áætlanir um ferðir sínar.
„Stærsti dagurinn til þessa var þegar um 29.000 einstakir notendur komu á síðuna. Við fáum stundum hundruð fyrirspurna á dag um færð frá fólki sem kemur að lokunum eða vill fá nánari upplýsingar. Þeim er svarað í gegnum netspjall sem er öllum opið.“ Jónas nefndi að þegar Hellisheiði, Þrengsli, Lyngdalsheiði og fleiri vegir á Suðurlandi lokuðust fyrr í vetur hafi netspjall Safetravel.is bókstaflega logað. Ferðamenn sem komust ekki í náttstað eða annað spurðu hvað þeir ættu að gera og var leiðbeint eftir megni.
Safetravel.is notar einnig samfélagsmiðla til að miðla upplýsingum. Í fyrra var t.d. sett viðvörun vegna aðsteðjandi óveðurs á Facebook. Á innan við sólarhring höfðu meira en 400.000 manns skoðað færsluna, að því er fram kemur í umfjöllun um vef þennan í Morgunblaðinu í dag.