„Fyrst og fremst er ég ánægður fyrir hönd okkar félagsmanna og þeirra sem voru að fá þessar boðuðu hækkanir,“ segir Ragnar Þór Ingólfsson, formaður VR. Almenna leigufélagið hefur dregið til baka fyrirhugaðir hækkanir leigu sem áttu að koma til fram­kvæmda á næstu þrem­ur mánuðum.

„Þetta er mjög ánægjuleg lending. Í byrjun mars verður þessu fólki boðið upp á möguleika á leigusamningum til mun lengri tíma en áður hafa þekkst á íslenskum leigumarkaði,“ segir Ragnar.

Frétt af mbl.is

Dregur fyrirhugaðar hækkanir til baka

Greint var frá þessu í sameiginlegri yfirlýsingu VR og Almenna leigufélagsins síðdegis. Þar kom enn fremur fram að unnið yrði að breytingum á leigusamningum félagsins með það að mark­miði að bjóða samn­inga til lengri tíma en þekkst hef­ur á al­menna markaðnum, þar sem tryggt er hús­næðis­ör­yggi og stöðugra leigu­verð. 

VR hafði hótað því að taka allt sitt fé, 4,2 millj­arða, úr eign­a­stýr­ingu hjá Kviku banka. Kvika er eig­andi fjár­mála­fyr­ir­tæk­is­ins Gamma og Al­menna leigu­fé­lagið er í eigu sjóðs sem er í stýr­ingu hjá Gamma.

Mikið álag sem fylgir stöðugum flutningum

Ragnar segir að grunnforsenda þess að hér geti byggst upp heilbrigður leigumarkaður sé að fólki sé tryggt framfærslulegt öryggi og að búsetuöryggi sé tryggt. „Fólk er kannski að gera leigusamning í einhverju hverfi þar sem börnin þeirra sækja leik- og grunnskóla og það þarf svo alltaf að hafa þetta búsetuóöryggi hangandi yfir sér,“ segir Ragnar og bendir á að fjölskyldur þurfi jafnvel að flytja hverfa á milli:

„Það er orðið mjög alvarlegt lýðheilsumál ef börn ná ekki að skjóta niður félagslegum rótum. Sömuleiðis er mikið álag sem fylgir því að vera í stöðugum búferlaflutningum. Þetta er gríðarlega stórt og mikið hagsmunamál fyrir viðskiptavini leigufélaganna. Það er ofboðslega ánægjulegt að við skulum hafa náð þessari lendingu og fundið fyrir þessum vilja hjá Almenna leigufélaginu að hafa farið í þetta með okkur.“

Að Ragnars mati sýnir þetta að ýmislegt sé hægt ef fólk talar saman. VR ætli að leggja sitt af mörkum til að hér verði byggður upp heilbrigðari húsnæðismarkaður og eru til að vinna að því með hverjum þeim sem hefur áhuga.

Tengdar fréttir

Húsnæðismarkaðurinn

Nýjar íbúðir á Völlunum rjúka út

• Gerir ráð fyrir 150 samningum í næstu viku
• Ekki byggt í takt við áform sveitarfélaga
• „Maður sefur ekki á næturnar“
• „Það er skiljanlegt að þolinmæði þeirra sé lítil“

» Fleiri tengdar fréttir

Gamma/Kvika

Fleiri millifærslur tilkynntar til saksóknara

• Fyrrverandi framkvæmdastjóri Upphafs kærður
• Fjárhagslegri endurskipulagningu Upphafs lokið
• Skilur ekki hvernig þetta gat gerst allt í einu
• Tryggja Upphafi viðbótarfjármagn í vikunni

» Fleiri tengdar fréttir

• 1 blogg um fréttina

Bloggað um fréttina

• Jóhannes Laxdal Baldvinsson: Ragnar Þór beitir afli sem virkar.