Tómas Ingi Hrólfsson, nemandi við Menntaskólann við Hamrahlíð, bar sigur úr býtum í Stærðfræðikeppni framhaldsskólanema sem fram fór á laugardag, en 35 nemar tóku þátt í keppninni. Sigur Tómasar Inga var nokkuð afgerandi, en hann hlaut 59 stig af 60 mögulegum.
Í öðru sæti var Hrólfur Eyjólfsson úr Menntaskólanum í Reykjavík, en hann hlaut 48 stig. Í þriðja sæti var svo Andri Snær Axelsson, einnig úr MR, með 47 stig.
Nemendurnir sem enduðu í 18 efstu sætunum munu taka þátt í Norrænu stærðfræðikeppninni fyrir Íslands hönd, en hún fer fram 1. apríl næstkomandi, en einnig hefur þeim Tómasi Inga og Andra Snæ verið boðið að taka sæti í sex manna liði Íslands fyrir Ólympíukeppni í stærðfræði, sem fram mun fara í Bath í Bretlandi.
Þeim Árna Bjarnsteinssyni og Vigdísi Gunnarsdóttur, sem bæði eru í MR, hefur einnig verið boðið sæti í ólympíuliðinu, en þau enduðu í 4.-5. sæti með 42 stig hvort. Hrólfur, sem endaði í öðru sæti, getur því miður ekki tekið þátt í þeirri keppni þar sem hann verður orðinn of gamall er hún fer fram, samkvæmt því sem fram kemur í fréttatilkynningu. Tvö sæti í liðinu eru enn laus og mun það ráðast eftir norrænu keppnina hvaða tveir nemendur komast í íslenska ólympíuliðið.
Úrslit voru tilkynnt í verðlaunahófi í Háskólanum í Reykjavík í gær, en þar var farið yfir stærðfræðikeppnisárið og viðurkenningar afhentar, en efstu keppendur hlutu auk þess peningaverðlaun; 50 þúsund fyrir 1. sæti, 30 þúsund fyrir 2. sæti og 20 þúsund fyrir 3. sæti.
Keppnin er undirbúin í sjálfboðaliðastarfi nefndar á vegum Stærðfræðafélags Íslands og Félags raungreinakennara og fyrir úrslitakeppnina lagði Háskólinn í Reykjavík til húsnæði og kaffiveitingar. Alls 341 nemandi víðs vegar af landinu úr 20 framhaldsskólum tók þátt í forkeppninni í ár, en þeim rétt rúmlega fjörutíu sem bestum árangri náðu þá var boðið til leiks í úrslitum. Hafa þeir nemendur fengið send æfingadæmi í vetur, til undirbúnings fyrir úrslitarimmuna.
Lokakeppnin samanstóð af sex verkefnum sem nemendur fengu fjóra tíma til að glíma við. Bestum árangri náðu þeir í dæmi 1 og 2 en dæmi 4 var vinsælast og var á þessa leið:
Meðal 25 hesta viljum við finna þrjá þá fljótustu. Við höfum enga klukku en hlaupabraut þar sem við getum látið fimm hesta hlaupa í einu og séð í hvaða röð þeir koma í mark. Gerum ráð fyrir að sérhver hestur hlaupi á föstum hraða og að allir séu þeir misfljótir. Sýnið að hægt er að finna þrjá fljótustu hestana og innbyrðis röð þeirra í sjö hlaupum.
Vitanlega þurfti rökstuðningur að fylgja svarinu, að því er fram kemur í fréttatilkynningu. Hér að neðan er listi yfir þá 18 nemendur sem náðu bestum árangri í keppninni og fara fyrir Íslands hönd í Norrænu stærðfræðikeppnina:
Úrslitasæti |
Nafn |
Skóli |
1. |
Tómas Ingi Hrólfsson |
Menntaskólanum við Hamrahlíð |
2. |
Hrólfur Eyjólfsson |
Menntaskólanum í Reykjavík |
3. |
Andri Snær Axelsson |
Menntaskólanum í Reykjavík |
4.-5. |
Árni Bjarnsteinsson |
Menntaskólanum í Reykjavík |
4.-5. |
Vigdís Gunnarsdóttir |
Menntaskólanum í Reykjavík |
6.-7. |
Þorsteinn Ívar Albertsson |
Menntaskólanum í Reykjavík |
6.-7. |
Friðrik Snær Björnsson |
Menntaskólanum á Akureyri |
8.-9. |
Jón Gunnar Hannesson |
Menntaskólanum í Reykjavík |
8.-9. |
Arnar Ágúst Kristjánsson |
Menntaskólanum í Reykjavík |
10.-11. |
Margrét Snorradóttir |
Menntaskólanum í Reykjavík |
10.-11. |
Heiðar Snær Ásgeirsson |
Kvennaskólanum í Reykjavík |
12.-13. |
Skjöldur Orri Eyjólfsson |
Menntaskólanum í Reykjavík |
12.-13. |
Guðmundur Freyr Ellertsson |
Menntaskólanum í Reykjavík |
14. |
Andri Þór Stefánsson |
Menntaskólanum á Akureyri |
15. |
Bjarki Baldursson Harksen |
Menntaskólanum í Reykjavík |
16. |
Magni Steinn Þorbjörnsson |
Menntaskólanum á Akureyri |
17.-18. |
Friðrik Valur Elíasson |
Menntaskólanum á Akureyri |
17.-18. |
Davíð Freyr Þorsteinsson |
International School of Brussels |