Ljóst var að úrslit úr kosningu um verkfallsaðgerðir innan VR hefði aldrei getað orðið jafn afgerandi og t.d. í Eflingu að sögn Ragnars Þórs Ingólfssonar formanns. Hins vegar sýni niðurstöðurnar að upplegg stjórnarinnar hafi verið rétt og nú sé kominn mikill þrýstingur á viðsemjendurna.
„Nú hefur þrýstingur á okkar viðsemjendur að koma að borðinu með myndarlegri hætti en þeir hafa gert aukist mjög mikið,“ sagði Ragnar í samtali við mbl.is skömmu eftir að úrslit úr atkvæðagreiðslu þar sem samþykkt var að fara ætti í verkfallsaðgerðir 22. mars voru ljós. Þá munu félagsmenn VR í hópbifreiðafyrirtækjum á félagssvæði VR og í gistiþjónustu á höfuðborgarsvæðinu og í Hveragerði leggja niður störf nema samningar náist.
Aðgerðirnar voru samþykktar naumlega með 52,25% atkvæða og í myndskeiðinu er Ragnar spurður út í hvaða þýðingu það hafi að stuðningur félagsmanna sé ekki meiri.