Borgarráð hefur heimilað umhverfis- og skipulagssviði að bjóða út framkvæmdir við malbikun á þessu ári. Til stendur að malbika 35 kílómetra af götum borgarinnar sem mun kosta rúmar 1.400 milljónir króna.
Það eru um 8,5% af heildarlengd gatna í borginni.
Þetta kemur fram í tilkynningu.
Undanfarin ár hefur Reykjavíkurborg verið í miklu malbikunarátaki en á árunum eftir hrun var dregið úr malbikun til að mæta efnahagsástandinu.
Í fyrra var malbikað fyrir rúmlega tvo milljarða sem var met en þá var lagt malbik á 9,4% gatnakerfisins í borginni. Ef árlega eru endurnýjuð um 6% af heildarlengd gatnakerfisins er það í jafnvægisástandi.
Bæði er um að ræða malbikun yfirlaga sem og endurnýjun með fræsingu og malbikun.
Þá verður einnig unnið við hefðbundnar malbiksviðgerðir í sumar og er kostnaður við þær áætlaður 205 milljónir króna.
Samkvæmt fjárhagsáætlun 2018-2022 er gert ráð fyrir 6.120 milljónum króna til endurnýjunar á malbiksyfirlögum auk hefðbundinna malbiksviðgerða, að því er segir í tilkynningunni.
Að auki verða götur sem til stendur að endurnýja í miðborginni malbikaðar, m.a. Frakkastígur og vestasti hluti Hverfisgötu.