Tvær óþekktar flugvélar komu inn í loftrýmiseftirlitssvæði Atlantshafsbandalagsins seint í gærkvöldi, en þær voru hvorki með ratsjárvara í gangi né höfðu tilkynnt sig til flugumferðarstjórnar.
Þetta kemur fram í tilkynningu frá Landhelgisgæslunni. Í samræmi við vinnureglur Atlantshafsbandalagsins flugu tvær orrustuþotur ítalska flughersins, sem eru staddar hér á landi við loftrýmisgæslu, til móts við vélarnar til að auðkenna þær.
Þarna reyndust tvær rússneskar sprengjuflugvélar af gerðinni Tupolev Tu-142 (Bear F) á ferðinni. Þær voru innan loftrýmiseftirlitssvæðis Atlantshafsbandalagsins en utan íslenskrar lofthelgi.
Rússneskar herflugvélar flugu síðast inn í loftrýmiseftirlitssvæði fyrr í þessum mánuði.