Innlent | mbl | 1.4.2019 | 8:43 | Uppfært 9:50

Býst við meiri röskun síðdegis

Færðin var heldur þung í morgun og ofan á það bættist verkfall bílstjóra Almenningsvagna Kynnisferða. Farþegar hafa heilt yfir verið upplýstir um verkfallsaðgerðirnar og áhrif þeirra, að sögn upplýsingafulltrúa Strætó. mbl.is/Eggert Jóhannesson

„Við fyrstu sýn virðist þetta ganga þokkalega, það eru tveir bílar stopp hérna fyrir utan hjá okkur í Mjóddinni,“ segir Guðmundur Heiðar Helgason, upplýsingafulltrúi Strætó.

Tíu leiðir Strætó stöðvuðust klukkan sjö og hefjast ekki að nýju fyrr en klukkan 9 vegna verkfalls bílstjóra Almenningsvagna Kynnisferða. Aðgerðirnar hafa áhrif á um 15 þúsund farþega.

Frétt af mbl.is

Akstri hætt klukkan 7

Guðmundur hefur verið í Mjóddinni frá því snemma í morgun og þeir bílstjórar sem hann hefur náð tali af sögðu að allt hefði gengið vel fyrir sig og að farþegar hefðu yfirgefið vagnana án vandkvæða. Hann vissi ekki til þess að bílstjórar hygðust hittast á meðan stöðvun á akstri stendur yfir.

Aukið álag í þjónustuveri Strætó

Guðmundur segir að heilt yfir hafi farþegar verið upplýstir um verkfallsaðgerðirnar og áhrif þeirra. „Ég heyrði af þremur í farmiðasölunni sem voru ekki meðvitaðir en þeir gátu flestir nýtt sér aðrar leiðir í kerfinu.“ Þá hefur verið aukið álag í þjónustuveri Strætó það sem af er morgninum.

Við verkfallsaðgerðirnar er miðað við það að vagnarnir stoppi á fjölförnum stöðum, svo sem í Mjódd eða á Hlemmi, en ekki á stoppistöð á stórri umferðargötu, að sögn Guðmundar. „Þetta er algjör nýlunda, þetta hefur held ég aldrei verið gert áður og við fengum engar leiðbeiningar hvernig við áttum að gera þetta.“

Akstur hefst að nýju klukkan 9, seinni fasi verkfallsaðgerða í dag verður milli klukkan 16 og 18. Guðmundur segir að búast megi við að röskunin verði meiri þá, á háannatíma dagsins í umferðinni.

Verkfallið hefur áhrif á leiðir 12, 14, 15, 16, 17, 21, 24, 28, 35 og 36. Verkfall þeirra hefst að nýju klukkan 16:00 og stendur til 18:00.

Á vef Strætó má finna frekari upplýsingar um áhrif verkfallsaðgerðanna

Verkfallsaðgerðirnar standa út allan mánuðinn, náist ekki samningar. Fundur í kjaraviðræðum Samtaka atvinnulífsins við Eflingu, VR og samflot fjögurra annarra verkalýðsfélaga hefur staðið yfir alla helgina og stóð yfir fram á ellefta tímann í gærkvöldi í húsnæði ríkissáttasemjara en var þá frestað fram til klukkan hálftíu í dag.