Fundi samflots iðnaðarmanna og Samtaka atvinnulífsins hjá ríkissáttasemjara hefur verið frestað til morguns, en til stóð að hann færi fram kl. 14 í dag. Kristján Þórður Snæbjarnarson formaður Rafiðnaðarsambandsins yfirgaf Karphúsið núna á þriðja tímanum.
Hann segir við mbl.is að það sé alveg „nóg að gera“ hjá ríkissáttasemjara og SA við að klára samningana við verslunarmenn og aðildarfélög Starfsgreinasambandsins, sem á að undirrita núna síðdegis. Því hafi fundinum verið frestað.
„Hann er kl. 14 á morgun,“ segir Kristján Þórður. Aðspurður segir hann iðnaðarmenn ekki hafa fengið að sjá þann kjarasamning sem er verið að leggja lokahönd á núna í þessum skrifuðu orðum og verður undirritaður innan skamms.
Hann segir þó að iðnaðarmenn hafi fengið „aðeins kynningu á upplegginu fyrir nokkrum dögum síðan“ en að hann viti ekki hvernig vinnunni hafi fleytt allra síðustu daga.
Spurður hvort honum hafi litist eitthvað á það upplegg sem kynnt var iðnaðarmönnum, segist Kristján Þórður ekkert ætla að tjá sig um það.
Samflot iðnaðarmanna samanstendur af Rafiðnaðarsambandi Íslands, Samiðn, Félagi bókagerðarmanna, Matvís, Félagi hársnyrtisveina og VM, sem er félag vélstjóra og málmtæknimanna.