Eldur um borð í fiskibáti á Breiðafirði

Stjórnstöð Landhelgisgæslunnar barst rétt fyrir sex í kvöld tilkynning um eld um borð í fiskibátnum Æsi. Þrír voru um borð í bátinum þegar eldurinn kom upp, en hann var þá staddur vestur af Flatey á Breiðafirði.

Þegar í stað var ákveðið að kalla út TF-LIF, þyrlu Landhelgisgæslunnar, sem tók á loft frá Reykjavíkurflugvelli skömmu síðar, að því er fram kemur í tilkynningu frá Landhelgisgæslunni. Einnig  var TF-SIF, flugvél Landhelgisgæslunnar, beðin um að halda að bátnum, varðskipið Týr og björgunarsveitir Landsbjargar á Snæfellsnesi.

Var flugvélin, sem var í löggæsluverkefni þegar útkallið barst, komin yfir bátinn klukkan  18:09 en þá voru mennirnir þrír komnir í flotgalla. Enginn reykur var þá sjáanlegur í bátnum, en hiti engu að síður greinanlegur með hitamyndavél flugvélarinnar.

Björgin, björgunarskip Slysavarnafélagsins Landsbjargar, varðskipið Týr og TF-LIF eru nú á leið á vettvang auk þriggja harðbotna slöngubáta frá Landsbjörg. Eins er fiskibáturinn Hafey komin að bátnum og eru skipverjarnir þrír óhultir.

Áhöfnin á Hafey tók Æsi í tog á áttunda tímanum í kvöld og dregur hann nú áleiðis til Brjánslækjar.

Björgunarskipinu Björgu frá Rifi, varðskipinu Tý, flugvél Landhelgisgæslunnar og þyrlunni Líf var hins vegar snúið við.

Fréttin hefur verið uppfærð.

• Blogga um frétt