„Þessi tímabundna töf á vandasömum flutningi hvalanna er vegna veðurs og erfiðra aðstæðna til flutninga sjóleiðina frá landi til Vestmannaeyja. Flutningarnir fara fram þegar veður og aðstæður leyfa,“ segir í fréttatilkynningu frá góðgerðarsamtökunum Sealife Trust þar sem staðfest er að fyrirhugaðir flutningar á mjaldrasystrunum Little Grey og Little White með flugi frá Kína til Íslands hafi frestast.

Frétt af mbl.is

Ferð mjaldranna frestað um sinn

„Það er flókið mál að endurskipuleggja flutninginn um langan veg á alþjóðavísu, en við vinnum náið með teymi okkar og flutningsaðilum til að fullkomna verkið. Fyrst og fremst höfum við velferð Little Grey og Little White í huga,“ segir enn fremur en mjaldrarnir áttu að koma til landsins í dag samkvæmt fyrri áætlun. Veður hér á landi og lokun Landeyjahafnar hefur áhrif í þessum efnum.

„Við höfum unnið vandlega með flutningsaðila okkar, sem er flugfélagið Cargolux í Luxemborg og íslenskum stjórnvöldum, til að geta flutt Little Grey og Little White á öruggan hátt á nýjar heimaslóðir í sjónum við Heimaey. Við viljum þakka öllum samstarfsaðilum óeigingjarnt starf, sérstaklega Cargolux og íslensku ríkisstjórninni,“ segir einnig. Mjaldrarnir verði undirbúnir af kostgæfni fyrir flutninginn á næstu vikum.

„Þetta er tímabundin töf sem mun ekki hefta okkur í skapa fyrsta griðastað hvala í heiminum í vernduðu sjávarumhverfi á Íslandi.“ Tilkynnt verði nánar um fyrirkomulag flutninganna þegar aðstæður leyfi.

Tengdar fréttir

Mjaldrar í Vestmannaeyjum

Önnur mjaldrasystirin veik

• Olíuleki í heimkynnum mjaldranna
• Kví mjaldurssystra er komin til Eyja
• Allt virðist mögulegt í Eyjum
• Stórkostlegt að sjá þær synda í fyrsta sinn

» Fleiri tengdar fréttir

• Blogga um frétt