Það viðrar ágætlega til skíðaiðkunar í dag, föstudaginn langa, fyrir norðan, austan og vestan. Höfuðborgarbúar verða hins vegar að sætta sig við að búið er að að loka Bláfjöllum og Skálafelli endanlega þennan veturinn.
mbl.is hefur tekið saman stöðuna á opnunum skíðasvæðum landsins í dag og tengla á vefsíður skíðasvæðanna, þar sem finna má nánari upplýsingar um dagskrá og færð.
Hlíðarfjall Akureyri: Opið 9-16. „Páskarnir og einn best tími ársins er nú genginn í garð. Stefnir í fína páskahelgi og allir glaðir,“ segir í tilkynningu. Hæg sunnanátt, 3-5 m/s og bjart yfir. Hiti 2 til 4 gráður en frystir í nótt.
Seljalandsdalur Ísafirði: Opið 10-17. Sannkallað fjölskyldufjör með páskaeggjaratleik við íþróttahúsið á Torfsnesi og þá stendur skíðafélagið fyrir furðufataratleik fyrir alla fjölskylduna.
Skarðsdalur Siglufirði: Opið 10-16. Samkvæmt vefsíðu er vorfæri en brekkurnar breiðar og nægur snjór í efri hluta svæðisins, en það þarf að fara varlega á neðsta hluta þess. Tíu skíðaleiðir eru klárar í dag og flott utanbrautarfæri í Tröllafjöllunum.
Böggvisstaðafjall Dalvík: Opið 10-16 í neðri lyftubrekku og barnabrekku. Blautt færi, 10°C.
Stafdalur Seyðisfirði: Opið 10-16 í öllum lyftum. Blautt vorfæri.
Oddskarð Fjarðabyggð: Opið í byrjenda- og eittlyftu frá 10-16. Samkvæmt vefsíðu er of hvasst á toppnum til að keyra lyftu. Vorfæri er í brekkunum.