Allt tiltækt slökkvilið á höfuðborgarsvæðinu var kallað út rétt fyrir klukkan fjögur vegna elds í fjölbýlishúsi í Vallarási í Árbæ. Eldurinn kom upp í lyftu í húsinu.
Tilkynning barst um svartan reyk sem lagði frá fimmtu hæð hússins. Samkvæmt upplýsingum frá varðstjóra kom eldurinn upp í stjórnbúnaði lyftunnar og var um minniháttar atvik að ræða en til að gæta fyllsta öryggis var allt tiltækt slökkvilið kallað út.
Búið er að slökkva eldinn en slökkviliðsmenn frá tveimur starfsstöðvum vinna að því að loft- og reykræsta í húsinu. Íbúar hússins voru ekki í hættu.
Fréttin hefur verið uppfærð.