14,9% félagsmanna í Verkalýðsfélagi Grindavíkur höfðu greitt atkvæði um nýjan kjarasamning kl. 11.30 í dag. Alls greiða um 800 atkvæði um samninginn og um helmingur þeirra er af erlendum uppruna. Hægt er að greiða atkvæði til kl. 16 í dag.
Hörður Guðbrandsson formaður Verkalýðsfélags Grindavíkur bindur vonir við að um 20% taki þátt í atkvæðagreiðslunni. Hann bendir á að það gæti gerst og minnir á að hægt er að greiða atkvæði til klukkan 16 í dag. Hann telur þó ólíklegt að þátttakan taki kipp það lita sem eftir er.
„Það er ekki einhlít skýring á því,“ segir hann spurður hvers vegna hann telji þátttökuna ekki betri en raun ber vitni. Hörður segir að reynt verði að rýna í það.
Hann telur ólíklegt að atkvæðagreiðslan hafi farið framhjá félagsmönnum. Hún hafi verið vel kynnt fyrir þeim þegar kjarasamningar lágu fyrir meðal annars á kynningarfundi. Eftir hann hafi margir greitt atkvæði.
Talsvert rennirí hefur verið á skrifstofu verkalýðsfélagsins frá því opnað var fyrir atkvæðagreiðsluna 12. apríl og fólk óskað eftir aðstoð við að komast í tölvu.
Á morgun verður greint sameiginlega frá niðurstöðu atkvæðagreiðslunnar um lífskjarasamningana hjá öllum stéttarfélögunum.