Hægt og illa gengur að finna hjúkrunarfræðinga og sjúkraliða til starfa á Seltjörn, nýju hjúkrunarheimili við Safnatröð á Seltjarnarnesi. Vegna þessa eru einungis nýtt 10 hjúkrunarrými af 40.
Þetta segir Svanlaug Guðnadóttir, framkvæmdastjóri hjúkrunar, í samtali við Morgunblaðið, en stíft hefur verið auglýst eftir starfsfólki frá því í janúar síðastliðnum.
„Það hefur heldur ekki gengið að fá hjúkrunarnema, ég hélt að við myndum fá þá til okkar í sumar. Maður er orðinn hálfráðþrota eins og staðan er,“ segir Svanlaug.
Í umfjöllun um mál þetta í Morgunblaðinu í dag segir Guðbjörg Pálsdóttir, formaður Félags íslenskra hjúkrunarfræðinga, mönnunarvanda hjúkrunarheimilisins Seltjarnar ekki koma sér á óvart, þörf sé á um 300 hjúkrunarfræðingum til starfa um allt land.