Góð og skemmtileg stemning myndaðist á tónlistarhátíðinni Heima en hún markar upphaf bæjarhátíðarinnar Bjartra daga í Hafnarfirði. Fjölskyldur opnuðu heimili sín í miðbæ Hafnarfjarðar en auk þess opnuðu Fríkirkjan og Bæjarbíó dyr sínar.
Listamennirnir sem komu fram voru Cell7, Mugison, Svavar Knútur, Warmland, Ragnheiður Gröndal, Jónas Sig, Á móti sól, Svala, Prins Póló, GÓSS, Rock Paper Sisters, Jón Jónsson og Friðrik Dór og One Bad Day (Eyvindur Karlsson).
Bjartir daga hefjast iðulega á síðasta degi vetrar og standa í nokkra daga. Dagskráin er fjölbreytt og á morgun, sumardaginn fyrsta, geta hátíðargestir meðal annars farið í menningargöngu um Setbergið, kíkt á hádegistónleika í Hafnarborg, spreytt sig í kajaksiglingum hjá Siglingaklúbbnum Þyt og hlýtt á fjölskyldudagskrá á Thorsplani.