Stjórn Neytendasamtakanna lýsir yfir furðu á ákvörðun fyrirtækja sem hafa gefið út að þau hyggist hækka vöruverð í kjölfar nýgerðra kjarasamninga. Neytendur muni ekki sætta sig við óábyrgar verðhækkanir.
Þetta kemur fram í ályktun stjórnar Neytendasamtakanna.
Eins og greint var frá fyrir liðna helgi boðaði ÍSAM hækkun á öllum vöruflokkum verði nýir kjarasamningar samþykktir. ÍSAM á m.a. Mylluna, Ora, Frón og Kexsmiðjuna.
Í ályktun Neytendasamtakanna segir að slíkar hækkanir muni leiða til verðbólgu sem aftur vegi að grundvelli kjarasamninga og séu bein ógn við hagsmuni neytenda, launafólks og fyrirtækja.
„Ljóst er að langflestir atvinnurekendur hafa svigrúm til að mæta kjarasamningnum með öðrum hætti en að seilast í vasa neytenda,“ segir í ályktuninni.
Neytendasamtökin hvetja neytendur til að beina viðskiptum sínum til ábyrgra fyrirtækja.