Ánægðastir með Lilju en óánægðastir með Sigríði

Ríkisstjórn Vinstri grænna, Sjálfstæðisflokksins og Framsóknarflokksins, undir forystu Katrínar Jakobsdóttur, …
Ríkisstjórn Vinstri grænna, Sjálfstæðisflokksins og Framsóknarflokksins, undir forystu Katrínar Jakobsdóttur, tók við völdum í lok nóvember 2017. mbl.is/Eggert Jóhannesson

Flestir Íslendingar eru ánægðir með frammistöðu Lilju Daggar Alfreðsdóttur, mennta- og menningarmálaráðherra, eða 67,7% en fæstir eru ánægðir með Sigríði Á. Andersen, 13,8%. Þetta er meðal þess sem kemur fram í nýrri könnun Maskínu um ánægju Íslendinga með ráðherra.

Sigríður steig til hliðar sem dómsmálaráðherra stuttu áður en könnunin var lögð fyrir. 65,8% svarenda voru óánægðir með störf hennar og 51,6% voru óánægðir með störf Bjarna Benediktssonar, fjármála- og efnahagsráðherra. Þá eru 47,7% óánægðir með störf Kristjáns Þórs Júlíussonar, sjávarútvegs- og landbúnaðarráðherra, 40,3% óánægðir með störf Svandísar Svavarsdóttur heilbrigðisráðherra, 30,9% óánægðir með störf Sigurðar Inga Jóhannssonar samgöngu- og sveitarstjórnarráðherra og 30,7% eru óánægðir með störf Ásmundar Einars Daðasonar, félags- og barnamálaráðherra. 

Flestir kjósendur eru ánægðir með störf Lilju Daggar Aldreðsdóttur en …
Flestir kjósendur eru ánægðir með störf Lilju Daggar Aldreðsdóttur en óánægðastir með störf Sigríðar Á. Andersen, sem steig til hliðar sem dómsmálaráðherra skömmu áður en könnunin var framkvæmd. Tölfræði/Maskína

Flestir ánægðir með Lilju, Þórdísi og Katrínu 

Fleiri Íslendingar eru þó ánægðir en óánægðir með frammistöðu fimm af ellefu ráðherrum ríkisstjórnar Vinstri-grænna, Sjálfstæðisflokks og Framsóknarflokks. Auk Lilju Daggar eru 43,2% ánægðir með störf Þórdísar Kolbrúnar Reykfjörð Gylfadóttur, ferðamála-, iðnaðar- og nýsköpunarráðherra, 38,6% ánægðir með störf Katrínar Jakobsdóttur, forsætisráðherra, 34% með störf Guðmundar Inga Guðbrandssonar, umhverfis-og auðlindaráðherra og 32,7% eru ánægðir með störf Guðlaugs Þórs Þórðarsonar, utanríkisráðherra.

Í niðurstöðum könnunarinnar kemur fram að almennt eru fleiri ánægðir með störf ríkisstjórnarinnar nú en í lok árs 2018. Meiri ánægja er með störf allra ráðherranna nú, að undanskilinni Sigríði Á. Andersen. Mesta aukning ánægju er með mennta- og menningarmálaráðherra þótt fólk hafi einnig verið ánægðast með Lilju Dögg í lok árs 2018.

Töluverður munur er á viðhorfi til starfa ráðherra eftir því hvaða flokk svarendur myndu kjósa ef kosið yrði til Alþingis í dag. Þeir sem myndu kjósa Vinstrihreyfinguna - grænt framboð eru ánægðastir með þá ráðherra sem koma úr flokknum, auk Lilju Daggar og það sama má segja um kjósendur Sjálfstæðisflokksins og Framsóknarflokksins sem almennt eru ánægðir með störf eiginráðherra.

Kjósendur Pírata eru óánægðari en aðrir með störf Bjarna Benediktssonar, Þórdísar Kolbrúnar Reykfjörð Gylfadóttur, Sigurðar Inga Jóhannssonar og Ásmundar Einars Daðasonar. Þeir sem myndu kjósa Samfylkinguna eru óánægðari en aðrir með störf Sigríðar Á. Andersen, Kristjáns Þórs Júlíussonar og Guðlaugs Þórs Þórðarsonar.

Þá er munur eftir kynjum á viðhorfi til fjögurra ráðherra. Þannig eru karlar ánægðari með frammistöðu Bjarna Benediktssonar en konur en konur eru ánægðari með frammistöðu Svandísar Svavarsdóttur, Kristjáns Þórs Júlíussonar og Guðmundar Inga Guðbrandssonar.

Um könnunina: Svarendur voru 848 talsins, koma úr Þjóðgátt Maskínu,sem er þjóðhópur fólks (e.panel)sem er dreginn með tilviljun úr Þjóðskrá og svarar á netinu. Svarendur eru af báðum kynjum,alls staðar að af landinu og 18 ára og eldri.Könnunin fór fram dagana 15.- 27. mars 2019.

mbl.is
Fleira áhugavert
Fleira áhugavert