Lítill ruslahaugur leynist í fjörunni við Sorpu í Grafarvogi

Rúmdýna, grill, borðtennisborð, límband og annað rusl sem fellur til frá heimilum fólks var á meðal þess sem varð á vegi Stefáns Þórs Pálssonar og Sigríðar Garðarsdóttur, eiginkonu hans, þegar þau gengu um Hamrahverfið í Grafarvogi í Reykjavík um nýliðna helgi.

Hafði úrgangi þessum verið hent í fjöruna í námunda við Sorpu, að því er fram kemur í umfjöllun um mál þetta í Morgunblaðinu í dag.

„Það var mjög ruslaralegt þarna, eins og oft er í kringum Sorpu. Við ákváðum að ganga þarna um þar sem við erum nýflutt í hverfið,“ segir Stefán Þór við Morgunblaðið, en hann hefur látið borgina vita af sóðaskapnum.