Ræða við Japan um fríverslunarsamning

Sendinefnd á vegum utanríkisráðuneytisins heldur til Tókýó í byrjun næsta mánaðar þar sem viðskiptasamráð á milli Íslands og Japan verður til umræðu sem vonir standa til að leiði til fríverslunarsamnings á milli ríkjanna.

Í umfjöllun um málið í Morgunblaðinu í dag segir Guðlaugur Þór Þórðarson utanríkisráðherra að slíkur samningur hafi verið vilji íslenskra stjórnvalda í meira en áratug.

Þetta mikilvæga fyrsta skref sem nú verði stigið sé afrakstur mikillar vinnu hér heima og gagnkvæms vilja frá Japan að auka samskipti ríkjanna enn frekar.