„Það hefur verið gott að upplifa þennan frábæra stuðning. Það hafa allir hugsað vel um mig og börnin mín,“ segir Elena Undeland, unnusta Gísla Þórs Þórarinssonar heitins, í viðtali við staðarmiðilinn í Finnmörku í Noregi.
Gísli var skotinn til bana aðfaranótt laugardags, en Gunnar Jóhann Gunnarsson, hálfbróðir Gísla, var úrskurðaður í fjögurra vikna gæsluvarðhald vegna málsins.
Meintur samverkamaður Gunnars er nú laus úr haldi. Lögregla hafði farið fram á vikulangt gæsluvarðhald yfir manninum og hafði Héraðsdómur Austur-Finnmerkur í Vadsø fallist á þá beiðni. Maðurinn, sem hefur neitað því að hafa komið nálægt málinu, áfrýjaði þeim úrskurði.
„Fólk hefur hjálpað mér við allt og þessa daga hefur til að mynda hefur verið séð um mig og börnin allan sólarhringinn. Það er eldað fyrir mig, þrifið og séð til þess að ég sofi,“ segir Elena.
„Ég verð að viðurkenna að þetta hefur verið svolítið upp og niður og dagarnir hafa verið erfiðir,“ bætir hún við.
Fram kemur í viðtalinu að bæði hún og Gísli séu frá Íslandi. Samfélag Íslandendinga í Mehamn sé slegið en vel sé hugsað um Elenu. „Það eru um 30 Íslendingar hérna. Við erum þéttur og góður hópur. Ég hef fengið hjálp frá bæði Íslendingum og Norðmönnum.“
Hún lýsir Gísla heitnum sem frábærum kærasta og góðum stjúpföður. „Gísli Þór, hjartað mitt, svo blíður og góður, heimsins besti kærasti og stjúpfaðir. Mitt allt,“ skrifaði hún á Facebook.
Gísli verður jarðsettur á Ísafirði en auk þess verður minningarathöfn um hann í Mehamn fyrir þá sem ekki komast til Íslands. Elena segir að það sé mikilvægt að Gísli sé grafinn með fjölskyldu sinni.
Eins og áður hefur komið fram safnar Elena fyrir því að hægt sé að flytja Gísla til hinstu hvílu á Ísafirði. Nú þegar hafa safnast 34.000 norskar krónur, jafnvirði um 478.000 íslenskra króna. Bankanúmerið er 4750.72.45982 en norskar bankamillifærslur krefjast ekki kennitölu.
„Við erum mjög þakklát fyrir öll framlögin,“ segir Elena.