Alls 184 verk í almenningsrými eru á skrá hjá Listasafni Reykjavíkur, þar af eru 155 verk í eigu Reykjavíkurborgar. Önnur verk eru ýmist í eigu ríkisins eða fyrirtækja.
Þetta segir Arna Schram, sviðsstjóri menningar- og ferðamálasviðs Reykjavíkurborgar, í samtali við Morgunblaðið. Útilistaverk borgarinnar þurfa reglulegt viðhald en nokkur þeirra frekari viðgerðir að sögn Örnu.
Þar á meðal er verkið Fallandi gengi eftir Inga Hrafn Hauksson. Þetta tilkomumikla listaverk stendur við Bæjarháls í Árbæjarhverfi, steinsnar frá Hádegismóum. Verkið hefur látið verulega á sjá. „Til stóð að gera við verkið síðastliðið sumar en veðrið setti strik í reikninginn. Verkið er því ofarlega á lista í ár og ekkert sem bendir til annars en að af viðgerð geti orðið í sumar,“ segir Arna.
Síðasta sumar var unnið að tuttugu verkefnum í þessa veru. Allt frá hreinsun á kroti og bónun yfir í stærri og umfangsmeiri viðgerðir eins og til dæmis á verkinu Sonatorrek í garði Ásmundarsafns við Sigtún og á Íslandsvitanum eftir Claudio Parmiggiani á Sandskeiði.
Í ár verður unnið að viðgerð og viðhaldi á sextán til tuttugu verkum og er stærsta verkefni ársins viðhald á Sólfarinu eftir Jón Gunnar Árnason, að sögn Örnu.