Fóðrun með dýraafurðum hættusöm

Séu svín fóðruð með dýraafurðum eða eldhúsúrgangi er tekin áhætta …
Séu svín fóðruð með dýraafurðum eða eldhúsúrgangi er tekin áhætta á ýmsum alvarlegum smitsjúkdómum. mbl.is/Árni Sæberg

Í tilkynningu frá Matvælastofnun, MAST, er vakin athygli á því að bannað sé að gefa búfé dýraafurðir og eldhúsúrgang. „Fóðrun dýra með dýraafurðum eða eldhúsúrgangi getur haft alvarlegar afleiðingar í för með sér enda ein helsta smitleið margra alvarlegra smitsjúkdóma í dýr“, segir jafnframt í tilkynningunni. 

Áhætta á gin- og klaufaveiki er til staðar þegar svín eru fóðruð með eldhúsúrgangi en gin- og klaufaveikifaraldur í Bretlandi hófst með slíku athæfi.

„Uppruni hans var rakinn til svínabús sem fóðraði með hitameðhöndluðum eldhúsúrgangi frá veitingastöðum. Þessi faraldur varð til þess að a.m.k. 6,5 milljónir dýra (nautgripir, sauðfé og svín) voru aflífuð og ársframleiðsla á búfjárafurðum á landsvísu var 20% minni en áætlað var.

Fjárhagslegt tjón landbúnaðar- og matvælageirans var um þrír milljarðar punda og ferðamálageirinn tapaði öðru eins. Heildarkostnaður fyrir þjóðina er talinn hafa verið um átta milljarðar punda. Ætla má að afleiðingar af slíkum faraldri hér á landi yrðu mjög alvarlegar, jafnvel óbætanlegar fyrir íslenska dýrastofna“, segir í tilkynningunni. 

Kjöt og dýraafurðir helsta smitleiðin

Gin- og klaufaveiki hefur aldrei borist til Íslands en svínapest (e. classical swine fever) sem kom upp árið 1942 og blöðruþot (e. vesicular exanthema) árið 2955 hafa borist í svín hérlendis. Báðir sjúkdómarnir eru mjög alvarlegir og var hægt að rekja smitið til eldhúsúrgangs í báðum tilvikum. 

„Samkvæmt fóðurlögum og reglugerð um aukaafurðir dýra er bannað að fóðra búfé, að loðdýrum undanskildum, með kjöti og öðrum dýraafurðum öðrum en mjólk og eggjum í ákveðnum tilfellum. Reglurnar banna jafnframt notkun hvers kyns eldhúsúrgangs, bæði frá heimilum og veitingastöðum, sem fóður fyrir búfé. Þetta á bæði við um hráar eða eldaðar matarleifar,“ segir í tilkynningunni. 

Ástæða bannsins er sú að kjöt og dýraafurðir eru ein helsta smitleið alvarlegra smitsjúkdóma í dýr, svo sem þeirra sem taldir voru upp hér að ofan. „Eldun dugar ekki til að drepa öll þau smitefni sem matarleifar geta innihaldið“, segir jafnframt í tilkynningunni. 

mbl.is