Tvær milljónir á 40 ára afmæli

Frá afhendingu gjafarinnar.
Frá afhendingu gjafarinnar. Ljósmynd/Aðsend

Íþróttasamband fatlaðra fékk tvær milljónir króna að gjöf í dag í tilefni af 40 ára afmæli sambandsins.

„Ég hef verið þeirrar gæfu og gleði aðnjótandi að fá að sjá með eigin augum þá ótrúlegu krafta sem búa innan sambandsins. Meðal annars þegar ég fékk að fylgja íslenska hópnum sem keppti á heimsleikum Special Olympics í Abu Dahbi fyrr á þessu ári,“ sagði Ásmundur Einar Daðason, félags- og barnamálaráðherra, sem færði Íþróttasambandi fatlaðra gjöfina og blómvönd fyrir hönd ríkisstjórnarinnar, að því er segir í tilkynningu.

Hann minnti gesti sömuleiðis á þá staðreynd að á meðal mesta afreksfólks íslenskra íþrótta er íþróttafólk með fatlanir. Má þar nefna Kristínu Rós Hákonardóttur, sem var tekin inn í heiðurshöll ÍSÍ árið 2013.

Ásmundur Einar sagði starfsemi sambandsins hafa mikilvæga samfélagslega þýðingu. „Það styrkir félagslegar aðstæður barna og ungmenna og eiga einkunnarorð þess einkar vel við á þessum tímamótum en þau eru: stærsti sigurinn er að vera með.”

mbl.is