Upp úr klukkan hálfeitt í nótt var tilkynnt um ölvaðan mann sem lá í götunni á Mosfellsheiði. Var hann vistaður í fangageymslu þar til ástand hans skánar.
Þetta kemur fram í tilkynningu frá lögreglunni á höfuðborgarsvæðinu eftir nóttina.
Talsverður erill var vegna ölvunar í miðborginni og voru alls fjórtán handteknir grunaðir um akstur undir áhrifum áfengis og/eða fíkniefna á höfuðborgarsvæðinu í nótt.
Rúmlega miðnætti var maður handtekinn grunaður um þjófnað í miðborginni og í Hafnarfirði var maður handtekinn fyrir að hlýða ekki fyrirmælum lögreglu, auk þess sem tilkynnt var um grunsamlegar mannaferðir, en aðilar voru farnir er lögregla kom á staðinn.