Fyrsti Þristurinn, af gerðinni DC-3/C-47, í leiðangrinum D-Day Scuadron, kom til Reykjavíkur í gær á leið sinni frá Bandaríkjunum til Frakklands til að taka þátt í athöfn í Normandí 6. júní nk.
Þann dag verða 75 ár liðin frá innrásinni í Normandi sem fjöldi DC-3-véla tók þátt í. Líkt og kom fram í Morgunblaðinu fyrir helgi er mikill viðbúnaður á Reykjavíkurflugvelli vegna komu Þristanna.
Alls fara 15 vélar frá Bandaríkjunum til Frakklands og koma hér við í áföngum. Annar eins fjöldi bætist svo við frá Bretlandi og meginlandi Evrópu. Von er á 11 Þristum til Reykjavíkur í dag og þrír koma síðar í vikunni.
Þá er von á Páli Sveinssyni frá Akureyri í dag en Þristavinafélagið vann í því um helgina að standsetja vélina fyrir sumarið.