Lögregla fór í síðdegis í gær um borð í rækjutogarann Sóleyju Sigurjóns til að skoða upptök elds sem kom upp í skipinu á föstudagskvöld. Skipið kom að bryggju á Akureyri síðdegis í gær.
Málið er nú í rannsókn hjá rannsóknardeild lögreglunnar á Norðurlandi eystra og sagði lögregla í samtali við mbl.is fyrstu skoðun benda til þess að eldurinn hafi verið í rafmagnstöflu í vélarrúmi skipsins, líkt og áður hefur komið fram. Ekki liggi þó enn fyrir hvað olli eldinum, en búið er að afhenda tryggingafélagi útgerðarinnar skipið.
Finnur Sigurbjörnsson, skipstjóri á togaranum Múlabergi SI-22, sem tók Sóleyju í tog sagði við mbl.is á laugardag að búnaður um borð sé mjög illa farinn. „Allt í vélarrúminu er óvirkt,“ sagði hann. „Það eru þrjár rafmagnstöflur brunnar og þetta virðist vera mikið tjón. Inni virðist hafa brunnið allt sem brunnið getur.“
Rækjutogarinn Sóley var um 95 sjómílur norður af landi þegar eldurinn kom upp í vélarrúminu á föstudagskvöld. Múlaberg var 25 sjómílur frá og hélt rakleiðis í átt að Sóleyju og dró skipið um 90 sjómílur. Sóttist sá dráttur hálfseinlega, enda troll Sóleyjar í eftirdragi lungann úr ferðinni.