Töluverðar umferðartafir hafa orðið vegna fræsunar og malbikunar fráreinar af Skeiðarvogi niður á Miklubraut til austurs.
Að sögn Ómars Smára Ármannssonar aðstoðaryfirlögregluþjóns höfðu framkvæmdirnar verið auglýstar á vef Vegagerðarinnar. Þar kemur fram að áætlað er að vinnan standi yfir frá klukkan 9 til 18 í dag.
Reynt verður í sumar að hafa vegaframkvæmdir á stofnbrautum á kvöldin og um nætur en annars staðar verður ekki hjá því komist að hafa þær á daginn, að sögn Ómars Smára.
Hann segir engar kvartanir hafa borist lögreglunni vegna framkvæmdanna í dag. Aðspurður býst hann við áframhaldandi vegaframkvæmdum á höfuðborgarsvæðinu nánast alla daga í sumar á meðan veðrið verður gott.
Í dag verður unnið að því að fræsa og malbika frárein af Skeiðavogi niður á Miklubraut til austurs. Fráreininni verður lokað og merkingar settar upp á viðeigandi stöðum. Áætlað er að vinna standi yfir milli 9.00 – 18.00. #vegavinna #færðin pic.twitter.com/K3JcXf74hU
— Vegagerðin | Iceland Roads (@Vegagerdin) May 22, 2019