Afstaða ráðherra stendur óhögguð
Setja bókamerki
Dómur Hæstaréttar í máli Jóns Ásgeirs Jóhannessonar og Tryggva Jónssonar breytir ekki þeirri ákvörðun dómsmálaráðherra að leita endurskoðunar á dómi Mannréttindadómstóls Evrópu (MDE) í máli Guðmundar Ástráðssonar gegn íslenska ríkinu.
„Sá dómur er fordæmalaus, með afgerandi minnihlutaáliti og áhrifa hans mun gæta um Evrópu alla. Ísland er aðili að Mannréttindasáttmála Evrópu og því eðlilegt að leita svara yfirdeildar þegar dómur MDE vekur upp svo veigamiklar spurningar um túlkun sáttmálans fyrir öll aðildarríki,“ segir í skriflegu svari Þórdísar Kolbrúnar R. Gylfadóttur dómsmálaráðherra við fyrirspurn mbl.is. Blaðamaður óskaði eftir viðtali en ráðherra kaus að veita skrifleg svör.
Íslenska ríkið hefur sent yfirdeild MDE beiðni um að Landsréttarmálið svokallaða verði endurskoðað og Þórdís ítrekar að ekki verður gripið til frekari aðgerða í málinu fyrr en niðurstaða liggur fyrir um hvort yfirdeild MDE taki málið upp að nýju. Segir hún að von sé á svörum frá yfirdeild dómstólsins innan fárra mánaða.
„Dómarar eru sjálfstæðir í störfum sínum“
Í niðurstöðu dóms Hæstaréttar í máli Jóns Ásgeirs og Tryggva frá því á mánudag segir að í íslenskum lögum sé ekki að finna heimild til endurupptöku máls í kjölfar þess að Mannréttindadómstóll Evrópu hafi komist að þeirri niðurstöðu að brotið hafi verið gegn mannréttindasáttmála Evrópu við meðferð máls fyrir íslenskum dómstólum, við þær aðstæður sem uppi voru í máli Jóns Ásgeirs og Tryggva.
Þórdís Kolbrún segir að það sé að endingu dómstólanna að meta hvort fyrri dómar þeirra hafi fordæmisgildi í öðrum málum, aðspurð hvort dómur Hæstaréttar hafi fordæmisgildi fyrir Landsréttarmálið.
Hvað varðar stöðu dómaranna fjögurra við Landsrétt, sem ekki hafa starfað við dómstólinn frá því í mars, þegar MDE komst að þeirri niðurstöðu að dómarar við Landsrétt hefðu verið ólöglega skipaðir, bendir ráðherra á að allir dómarar við Landsrétt eru lögmætt skipaðir samkvæmt dómi Hæstaréttar í maí 2018.
„Dómarar eru sjálfstæðir í störfum sínum og meta sjálfir hæfi sitt til að dæma í málum á hverjum tíma. Allt það sem gæti viðkomið þessu máli og þróun þess hlýtur að vega inn í það mat,“ segir Þórdís Kolbrún.
Hæstiréttur staðfestir vanhæfi alls Landsréttar
Hyggjast leyfa fólki að skoða gosið
Gerir ráð fyrir 150 samningum í næstu viku
Mun fara sparlega með málskotsréttinn
„Búið að vera í dreifingu í einhvern tíma“
Mikilvægt að vera á tánum
Myndskeið: Segjast hafa skotið niður sprengjuflugvél
Segjast ekki vera á kaldri slóð