Aðeins Bára Halldórsdóttir þarf að eyða upptökunum sínum af samtali sex þingmanna á vínveitingastaðnum Klaustri. Þetta kemur fram í svari Persónuverndar við fyrirspurn fréttastofu RÚV en stofnunin segir að úrskurður hennar í Klausturmálinu nái aðeins til þeirra sem aðild áttu að málinu.
Stjórn Persónuverndar komst að þeirri niðurstöðu í síðustu viku að Bára Halldórsdóttir hefði brotið af sér þegar hún tók upp samtal þingmanna Miðflokksins á Klaustri í lok nóvember á síðasta ári. Henni var ekki gert að greiða sekt.
Bára sendi upptökurnar til DV og Stundarinnar sem birtu fréttir upp úr henni og samkvæmt frétt RÚV fékk lagaskrifstofa Alþingis einnig afrit.