Öflugur hópur frá Eyjafjarðardeild ferðaklúbbsins F4X4 lagaði skemmdir eftir utanvegaakstur rússnesks ferðamanns í gærkvöldi.
Voru lagfæringarnar gerðar með samþykki landeigenda, sem kunnu klúbbnum góðar þakkir fyrir, að því er segir á tilkynningu á vef F4X4, og buðu þeir félagsmönnum í jarðböðin að verki loknu.
„Óhætt er að segja að allir hafi skilið sáttir eftir þetta vel unna verk.“
Alexander Tikhomirov, fræg rússnesk samfélagsmiðlastjarna sem sérhæfir sig í ljósmyndun og myndbandsupptökum á ferðalögum sínum um heiminn, ók utan vegar skammt frá jarðböðunum við Mývatn á dögunum og vakti sinnuleysi hans mikla athygli.