Umhverfisstofnun hefur lokað veginum vestan megin upp á gígbarminn á Ljótapolli í Friðlandi að Fjallabaki. Er það gert vegna þess að brekkan upp á gígbarminn er illfær og veldur umtalsverðu raski á hlíðum gígsins sem hefur áhrif á ásýnd svæðisins. Þetta kemur fram í tilkynningu frá stofnuninni.
Bent er á að bílastæði séu við rætur Ljótapolls og aðeins taki um 10 mínútur að ganga þaðan upp á gígbarminn.
Einnig er hægt að aka norðan megin við gíginn og upp á gígbarminn. Umhverfisstofnun bendir á að vegurinn að Ljótapolli er seinfarinn og einungis fær vel útbúnum jeppum.