„Óviðunandi hægagangur er í samningaviðræðunum að mati BHM,“ segir í tilkynningu frá BHM, Bandalags háskólamanna. Kjarasamningar aðildarfélaga BHM við ríkið, Reykjavíkurborg og Samband íslenskra sveitarfélaga hafa nú verið lausir í meira en tvo mánuði.

Viðræður hafa verið í gangi hjá sáttasemjara en þeim hefur miðað of hægt áfram, að mati BHM. BHM skorar í tilkynningunni á viðsemjendur sína að taka kjaraviðræðurnar „föstum tökum og ganga til samninga við félögin.“ 

Frétt af mbl.is

Reiknað með viðræðum í sumar

Aðildarfélög BHM hafna alfarið flatri krónutöluhækkun launa þar sem slíkt samrýmist ekki kröfum félaganna um eðlilegan fjárhagslegan ávinning háskólamenntunar og getur falið í sér kjararýrnun, segir í tilkynningunni en í viðtali við Morgunblaðið sagði Þórunn Sveinbjarnardóttir formaður BHM að því „hafi verið komið mjög skýrt á fram­færi við samn­inga­nefnd rík­is­ins að krónu­hækk­an­ir komi ekki til greina og það hef­ur með launa­bilið í samn­ing­un­um að gera.“

Hún sagði það vera sitt mat að krónu­tölu­hækk­an­ir hafi meiri ávinn­ing fyr­ir þá lægst launuðu en þá sem eru með hærri laun. Í síðustu samn­ing­um fé­lag­anna var samið um svo­kallaða blandaða leið; bæði krónu­tölu- og pró­sentu­hækk­un.

Bandalag háskólamanna er samtök 27 fag- og stéttarfélaga háskólamenntaðs fólks með samtals tæplega fjórtán þúsund félagsmenn innan sinna raða. Félagsmenn starfa á öllum sviðum íslensks atvinnulífs, jafnt hjá ríki, sveitarfélögum, sjálfseignarstofnunum og einkafyrirtækjum.

Tengdar fréttir

Kjaraviðræður

Aðalsteinn snýr aftur í Karphúsið

• „Mætti ganga hraðar“
• „Okkur þykir Isavia fullrólegt“
• Kjaradeilu vísað til ríkissáttasemjara
• Jöfnun launa milli markaða forsenda kjarasamninga

» Fleiri tengdar fréttir

• Blogga um frétt