Karlmaður á þrítugsaldri hefur verið ákærður fyrir stórfellt fíkniefnalagabrot, en hann kom til landsins með 3,35 kíló af kókaíni í flugi frá Tenerife á Spáni 10. mars síðastliðinn. Mál hans var þingfest í Héraðsdómi Reykjaness fyrr í dag.
Samkvæmt ákæru málsins var styrkleiki kókaínsins á bilinu 87-89%. Tollverðir á Keflavíkurflugvelli fundu efnin í tveimur ferðatöskum sem maðurinn flutti til landsins, en í ákæru eru þau eru sögð hafa verið ætluð til söludreifingar hér á landi í ágóðaskyni.
Ákæruvaldið gerir kröfu um að maðurinn, sem er 24 ára gamall, verði dæmdur til refsingar og greiðslu alls sakarkostnaðar.