Treysta ekki Miðflokknum

Heimildir mbl.is herma að erfitt sé að ná samkomulagi um ...
Heimildir mbl.is herma að erfitt sé að ná samkomulagi um þinglok þar sem þingflokki Miðflokksins sé ekki treyst. mbl.is/Hari

Það er mat sumra þingmanna að ekki sé hægt að treysta því að þingflokkur Miðflokksins standi við samninga um þinglok, einkum vegna þess að flokkurinn breytir ört kröfum sínum í samningaviðræðum. Þetta herma heimildir mbl.is á Alþingi.

Samkvæmt heimildum mbl.is hefur meirihlutinn á Alþingi verið meðal annars reiðubúinn að fallast á kröfu Miðflokksins um að þriðji orkupakkinn verði ræddur í tvo daga í lok ágúst. Það hafi hins vegar ekki dugað þar sem flokkurinn er sakaður um að setja fram nýjar kröfur í hvert sinn sem komið er til móts við kröfur hans.

Þá hafa margir stjórnarliðar átt ágætissamstarf við þingmenn Miðflokksins á yfirstandandi þingi í fleiri málum, en að þessu sinni hafi traust verið rofið og sakar einn heimildarmanna mbl.is Miðflokksmenn um að sýna ekki drengskap í deilunni.

Bergþór Ólason, þingmaður Miðflokksins, sagði í gær að undirritað hafi verið samkomulag um klukkan ellefu í gærkvöldi, en að einn flokkur hafi ekki viljað skrifa undir. Samkvæmt því sem mbl.is kemst næst var um drög að samkomulagi að ræða.

mbl.is