Blíða SH-277, fiskiskip sem er strand 1,3 sjómílur frá Stykkishólmi, ætti að komast aftur á flot eftir eina og hálfa til tvær klukkustundir, að sögn þess sem stýrir aðgerðum á vettvangi úr landi. Beðið er eftir flóði og horfur eru góðar.
Hér er bein útsending af strandinu í vefmyndavél.
„Um leið og það er komið það mikið í að það fer að fljóta ætti þetta ekki að vera vandi,“ segir Einar Þór Strand formaður svæðisstjórnar hjá Landsbjörgu á Snæfellsnesi í samtali við mbl.is. „Það er það mikið fallið út síðan hann fór upp á skerið. Það er bullandi dýpi fyrir aftan hann, þannig að hann mun fljóta,“ segir Einar, sem er bjartsýnn um að Blíða muni fljóta aftur á stað.
Klukkan hálftvö steytti Blíða á skeri sem ekki var vitað af. Höggið var nokkuð. Báturinn liggur nokkuð hallandi á skerinu. „Það er alltaf svolítið bank þegar menn lenda á skeri sem þeir vita ekki af. Þeir lenda með framendann á skerinu en það ætti þó að vera í lagi með vélarrúm og skrúfur,“ segir Einar.
Einar segir aðstæður „eins tryggar og hægt er að hafa þær.“ Þyrla Landhelgisgæslunnar er komin á vettvang, auk Björg, björgunarskips Landhelgisgæslunnar, Fjólu, fiskiskips sem var í grenndinni, og sjómælingaskipsins Baldurs. Auk þess eru björgunarbátar staddir nærri.