Meirihluti Íslendinga er jákvæður í garð alþjóðastofnana og þátttöku Íslands í alþjóðlegu samstarfi. Íslendingar eru sérstaklega jákvæðir í garð norræns samstarfs.
Þetta kemur fram á vef Stjórnarráðsins og er niðurstaða könnunar sem Maskína gerði fyrir utanríkisráðuneytið um viðhorf Íslendinga til alþjóðasamstarfs.
Mikill meirihluti svarenda telur hagsæld Íslands byggjast að miklu leyti á alþjóðlegri samvinnu (73,6%) og alþjóðlegum viðskiptum (78,3%). Þá voru 92% svarenda jákvæðir í garð norræns samstarfs. Jákvæðni er að sama skapi mikil í garð þátttöku Íslands í störfum Sameinuðu þjóðanna (77,9%) sem og mannréttindaráðs Sameinuðu þjóðanna (80,8%).
Viðhorf til Norðurskautsráðsins var mestmegnis jákvætt (73,8%) sem og viðhorf til Menningarmálastofnun Sameinuðu þjóðanna (UNESCO) (62,3%). Jákvæðni svarenda var minni í garð Evrópuráðsins í Strassborg (50,8%) og Alþjóðabankans (36%).
Evrópumálin voru skoðuð sérstaklega og er stuðningurinn við EES-samninginn mikill. Rúm 55% eru jákvæð gagnvart aðild að EES-samningnum en um 11,8% neikvæð.
Evrópusambandið er aftur á móti ekki jafn vinsælt en 43% svarenda eru andvígir inngöngu Íslands í ESB. Samkvæmt könnun Maskínu frá því í mars sl. eru 31,6% Íslendinga fylgjandi inngöngu í Evrópusambandið.
Flestum þykir mikilvægt að íslensk stjórnvöld veiti þróunarríkjum og íbúum þeirra aðstoð (79,1%) og á það sérstaklega við um mannúðaraðstoð. Fjórum af hverjum tíu finnst að það eigi að vera eitt af forgangsmálum íslenskra stjórnvalda að draga úr fátækt í þróunarríkjum en 26,6% voru því ósammála.
Niðurstöður könnunarinnar má nálgast hér í heild sinni. Hún var framkvæmd á netinu dagana 14.–27. maí og voru svarendur 824 talsins.