Kjartan stjórnarformaður UNICEF á Íslandi

Stjórn UNICEF á Íslandi á aðalfundi landsnefndarinnar í dag. F.v.: …
Stjórn UNICEF á Íslandi á aðalfundi landsnefndarinnar í dag. F.v.: Óttar Proppé, Erna Kristín Blöndal, Kjartan Örn Ólafsson, Guðrún Hálfdánardóttir, Sigríður Thorlacius og Styrmir Gunnarsson. Á myndina vantar Svöfu Grönfeldt, Jökul Inga Þorvaldsson og Lilju Hrund Ava Lúðvíksdóttur. Ljósmynd/Aðsend

Kjartan Örn Ólafsson tók við starfi stjórnarformanns UNICEF á Íslandi á ársfundi landsnefndarinnar sem fram fór í dag í Safnahúsinu. Hann tekur við af Ernu Kristínu Blöndal, sem gegnir nú stöðu skrifstofustjóra barna- og fjölskyldumála í  félagsmálaráðuneytinu, en hún mun áfram sitja í stjórn.

Kjartan er framkvæmdastjóri nýsköpunarfélagsins Volta ehf og hefur setið í stjórn UNICEF á Íslandi frá árinu 2016 og var áður varaformaður. Kjartan hefur undanfarin ár komið að uppbyggingu allmargra sprota- og tæknifyrirtækja bæði á Íslandi og erlendis sem stofnandi, stjórnarmaður, fjárfestir og ráðgjafi. Áður starfaði Kjartan um árabil sem framkvæmdastjóri á viðskiptaþróunarsviði fjölmiðlasamsteypunnar Bertelsmann í New York og leiddi nýsköpunarverkefni fyrir ýmis dótturfyrirtæki hennar, svo sem Random House, SonyBMG Music og Fremantle Media, sem öll eru leiðandi á heimsvísu á sínu sviði.

Hann hefur átt sæti í stjórnum fjölda fyrirtækja og samtaka beggja vegna Atlantsála svo sem American-Scandinavian Foundation, Datamarket, Já, Basno, Brunns vaxtasjóðs, Hörpu tónlistarhúss og verið formaður stjórnar Listahátíðar í Reykjavík. Kjartan lærði heimspeki og rökfræði á Íslandi og Ítalíu og er með MBA-gráðu frá Harvard Business School.

Þrír nýir taka sæti í stjórninni

Á ársfundinum tóku þrír nýir meðlimir sæti í stjórn, þau Óttar Proppé, Svafa Grönfeldt og Jökull Ingi Þorvaldsson, sem kemur inn sem varamaður. Óttar er tónlistarmaður, bóksali og fyrrverrandi heilbrigðisráðherra og Svafa er athafnarkona og fyrrverandi rektor Háskólans í Reykjavík. Jökull Ingi er nemandi í Menntaskólanum við Hamrahlíð og er fulltrúi Ungmennaráðs UNICEF í stjórn.

„Það á sér stað mikil endurnýjun í stjórninni okkar þetta árið og við kveðjum með söknuði fráfarandi stjórnarmeðlimi, þau Líney Rut Halldórsdóttur og Gunnar Hansson. Við færum þeim hjartans þakkir  fyrir ómetanlegan stuðning í gegnum árin og ötullega baráttu fyrir réttindum barna hér á landi og alþjóðlega. Um leið bjóðum við nýja stjórnarmeðlimi hjartanlega velkomna í hópinn,“ er haft eftir Bergsteini Jónssyni, framkvæmdastjóra UNICEF á Íslandi, í tilkynningu.  

Nýja stjórn UNICEF á Íslandi sem tók við í dag skipa því Kjartan Ólafsson, stjórnarformaður, Guðrún Hálfdánardóttir, varaformaður, Erna Kristín Blöndal, Guðrún Nordal, Óttar Proppé, Svafa Grönfeldt, Lilja Hrund Ava Lúðvíksdóttir og Jökull Ingi Þorvaldsson, fulltrúar ungmennaráðs, Sigríður Thorlacius og Styrmir Gunnarsson.

Stjórnarfólk UNICEF á Íslandi gegna störfum sínum í sjálfboðavinnu. Ársskýrslu UNICEF á Íslandi má nálgast hér.

mbl.is