Matvælasprotinn Lava Cheese, sem framleiðir snakk úr bráðnum og storknuðum osti, hefur lokið við 100 milljóna króna fjármögnun.
Féð ætlar fyrirtækið að nota til að sækja fram með vörur sínar í Skandinavíu, en félagið er nú þegar með skrifstofu í Svíþjóð auk skrifstofunnar hér á landi.
Í umfjöllun um mál þetta í Morgublaðinu í dag segir Guðmundur Páll Líndal, sem stofnaði Lava Cheese ásamt Jósep Birgi Þórhallssyni, að framleiðsla snakksins fari fram í Grafarvogi og eftirspurnin sé mikil. Um framleiðsluna sjá þrír flóttamenn frá Írak, Sýrlandi og Afganistan. Guðmundur segir að það sé stefna fyrirtækisins að ráða eingöngu flóttamenn í vinnu. Þeir séu góðir starfskraftar sem vilji vinna. Í Gotlandi í Svíþjóð, þar sem framleiðslan fyrir sænska markaðinn fer fram, sé hins vegar minna um flóttamenn og erfiðara að halda stefnunni til streitu.