Hafa aðeins lítil áhrif

helgi Gunnlaugsson, afbrotafræðingur og prófessor í félagsfræði við Háskóla Íslands, segir að fréttir af mönnum sem teknir voru með 16 kílógramma skammt af kókaíni á Keflavíkurflugvelli í maí, hafi aðeins lítil áhrif á fíkniefnamarkaðinn.

Fréttirnar telur hann vera eins konar „endurspeglun á ástandi“ hér á landi.

„Við höfum sögu af þessu hér heima. Við höfum fengið stór mál og höfum þá getað séð það hversu mikil áhrif þetta hafði á markaðinn í kjölfarið og það hefur í mesta lagi áhrif í mjög skamman tíma,“ segir Helgi. Segir hann að svo virðist sem fíkniefnainnflytjendur „hinkri“ í skamma stund eftir að stórar aðgerðir komast í hámæli. Telur hann mál af þessu tagi gefa vísbendingu um hversu mikil eftirspurn sé eftir fíkniefnum í samfélaginu.

Margeir Sveinsson aðstoðaryfirlögregluþjónn tekur undir með Helga og segir áhrif vegna lögregluaðgerða þar sem lagt er hald á mikið magn fíkniefna tímabundin og að ómögulegt sé að segja til um hversu lengi þau vari. „Við erum að fást við opinn markað, það er bara því miður þannig.“