Konan sem býr í íbúðinni sem varð eldi að bráð á stúdentagörðunum á Eggertsgötu fyrr í kvöld var færð í mjög annarlegu ástandi á slysadeild Landspítalans við Fossvog. Vitni sáu hana hlaupa úr íbúðinni með reykmökkinn á eftir sér og lét hún öllum illum látum á vettvangi, segir Jóhann Karl Þórisson aðstoðaryfirlögregluþjónn í samtali við mbl.is.
Hún er ekki talin alvarlega slösuð en verið er að athuga hvort hún kunni að vera með reykeitrun. Í framhaldinu verður hún vistuð í fangageymslu lögreglunnar á höfuðborgarsvæðinu þangað til hægt verður að yfirheyra hana.
Aðgerðum á vettvangi er lokið í bili og íbúðin hefur verið innsigluð. Á morgun hefst rannsókn á eldsupptökum.
Varðstjóri slökkviliðs höfuðborgarsvæðisins sagði í samtali við mbl.is fyrr í kvöld að vonlaust hefði verið að greina hvar eldurinn kom upp í íbúðinni vegna mikils tjóns.
Eldurinn kom upp í íbúð á 1. hæð fjölbýlishúss á Eggertsgötu 24 fyrr í kvöld og var allt tiltækt lið slökkviliðsins sent á vettvang. Klukkan hálfsjö náðist að slökkva eldinn og tók þá við reykræsting.
Ljóst er að tjónið í íbúðinni er töluvert og þá barst reykur í aðrar íbúðir fjölbýlishússins sem olli einhverjum reykskemmdum.