Siðanefnd Blaðamannafélags Íslands hefur vísað frá kæru Magnúsar Halldórssonar, blaðamanns og eins eiganda Kjarnans, á hendur Sigurðar Más Jónssonar blaðamanns og Gísla Frey Valdórssonar, ábyrgðamanns Þjóðmála, vegna umfjöllunar Sigurðar í vorhefti Þjóðmála.
Þetta er önnur kæran sem siðanefndin vísar frá vegna sömu skrifa Sigurðar, en áður hafði nefndin vísað frá máli Þórðar Snæs Júlíussonar, ritstjóra Kjarnans, en hann sakaði Sigurð um að fara ranglega með fjölmörg atriði í greininni.
Fram kemur í niðurstöðu siðanefndarinnar að Magnús hafi sent kæruna 31. Maí ásamt skjáskotum af bloggpistli Sigurðar frá 29. Apríl. Var málið tekið fyrir 3. Júlí. Taldi Magnús Sigurð hafa í fjölmörgum atriðum farið ranglega með staðreyndir.
Siðanefndin vísar til sömu röksemda og komu fram í fyrra málinu og vísar kærunni þar með frá. Í máli Þórðar taldi meirihluti nefndarinnar að um sé að ræða „framsetningu höfundar á skoðunum sínum á miðlinum fremur en rökstudda greiningu eða fréttaskýringu“.
Friðrik Þór Guðmundsson er aftur ósammála meirihluta nefndarinnar um frávísun málsins og telur að lýsingu Sigurðar Más á skrifum sínum í Þjóðmálum sem fréttaskýringu beri að virða. Þess vegna ætti að taka kæruna til efnislegrar meðferðar. Hann telur hins vegar að vísa eigi frá kærunni á hendur Gísla Frey þar sem hún sé bæði óljós og vanreifuð.
Auk Friðriks sitja í nefndinni Ásgeir Þór Árnason, Hjörtur gíslason, Björn Vignir Sigurpálsson og Nanna Teitsdóttir.