Skipin tvö gerð klár fyrir eigendaskiptin

Togskip Gjögurs hf. á Grenivík, Áskell EA 748 og Vörður EA 748, eru nú í Slippnum í Reykjavík. Er unnið að því að pússa og mála skipin áður en þau verða afhent nýjum eiganda, FISK á Sauðárkróki, fyrir mánaðarlokin.

Fisk Seafood á Sauðárkróki gekk frá kaupum á skipunum tveimur í lok árs 2018. Skipin voru seld án kvóta en í sérstökum viðskiptum með aflaheimildir keypti Fisk Seafood af Gjögri tæplega 350 tonna kvóta í ufsa og 245 tonn í djúpkarfa auk heimilda í fleiri tegundum. Verðmæti viðskiptanna miðað við þáverandi gengisskráningu var tæplega 1,7 milljarðar króna.

Gjögur hf. á Grenivík er að láta smíða tvö ný togskip í stað hinna fyrri sem nú hafa verið seld. Fjögur útgerðarfélög sömdu við VARD í Noregi um smíði sjö skipa. Það voru auk Gjögurs Bergur-Huginn(Síldarvinnslan) í Vestmannaeyjum, Skinney-Þinganes á Hornafirði og Samherji á Akureyri. Vörður, sem er fyrra skip Gjögurs, er væntanlegur í september. Nokkur skipanna voru smíðuð að hluta í Víetnam. sisi@mbl.is