Tilnefnd til verðlauna Chatham House

Katrín Jakobsdóttir forsætisráðherra.
Katrín Jakobsdóttir forsætisráðherra. mbl.is/Hari

Katrín Jakobsdóttir forsætisráðherra er tilnefnd til verðlauna bresku hugveitunnar Chatham House árið 2019, en tilnefningarnar voru opinberaðar í gær. Þar er hún ekki í slæmum félagsskap, en ásamt henni eru þeir tilnefndir Sir David Attenborough, sjónvarpslíffræðingurinn heimsþekkti og Abiy Ahmed, forsætisráðherra Eþíópíu.

Katrín er tilnefnd, samkvæmt umfjöllun á vef Chatham House, fyrir „einurð hennar við mótun framsækinnar stefnu Íslands á sviðum kynjajafnréttis og atvinnuþátttöku kvenna.“

Attenborough er tilnefndur fyrir að vekja upp mikla almenningsumræðu um plast í hafinu, með þáttum sínum Blue Planet II, sem sýndir voru á BBC, en náttúrusögudeild breska ríkisútvarpsins er raunar í heild sinni tilnefnd fyrir verkið.

Sir David Attenborough, hér að horfa á tennis á Wimbledon-mótinu …
Sir David Attenborough, hér að horfa á tennis á Wimbledon-mótinu á dögunum. AFP

Ahmed er svo tilnefndur fyrir viðleitni sína til að umbreyta stjórnarfari í Eþíópíu, fyrir að vera talsmaður málfrelsis og lýðræðis í ríkinu og fyrir að binda enda á áratugalangar illdeilur við nágrannaríkið Erítreu. Einnig fyrir að beita sér fyrir kynjajafnrétti og veita von um að friðsælari tímar séru framundan á svæðinu.

Abiy Ahmed, forsætisráðherra Eþíópíu.
Abiy Ahmed, forsætisráðherra Eþíópíu. AFP

Chatham House er bresk hugveita í alþjóðamálum, sem stofnuð var eftir fyrri heimsstyrjöldina og á sér því nærri 100 ára sögu. Hún hefur veitt verðlaun sín allt frá árinu 2005 og með þeim viðurkennt einstaklinga sem hafa átt mikilsverð framlög til alþjóðamála.

mbl.is