„Áhlaup frá versluninni“ á íslenska framleiðslu
Setja bókamerki
Halla Signý Kristjánsdóttir, þingmaður Framsóknarflokksins, hefur óskað eftir því að atvinnuveganefnd Alþingis komi saman og óski eftir gögnum frá ráðgjafanefnd inn- og útflutnings landbúnaðarvara til að hægt sé að taka afstöðu til tillögu nefndarinnar um að heimila innflutning á lambahryggjum á lækkuðum tollum vegna skorts. Hún segir um „meintan skort“ sé að ræða.
Erfitt að fá aðgang að gögnum
„Ég hef verið að kalla eftir þeim gögnum sem nefndin byggir þessa niðurstöðu á. Það hefur verið erfitt að fá þau og ég tel að það skipti máli að fara yfir þetta því í lögunum þá segir að það þurfi að vera skortur sem verður tilfallandi jafnvel í þrjá mánuði,“ segir Halla í samtali við mbl.is.
„Það má kalla þetta meintan skort því það er ekki skortur. Það hefur komið í ljós,“ bætir hún við.
50 tonn á leiðinni til landsins
Komið hefur fram í fjölmiðlum að 50 tonn af lambahryggjum hafi verið pantaðir og séu á leiðinni til landsins. Hryggirnir voru pantaðir eftir að ráðgjafanefnd um inn- og útflutning landbúnaðarvara lagði til við landbúnaðarráðherra að gefinn yrði út tímabundinn innflutningskvóti á lækkuðum tollum til að bregðast við skorti á innlendum lambahryggjum.
Áður en ráðherra samþykkti þá tillögu bárust nýjar upplýsingar þess efnis að það væri í raun og veru ekki skortur á lambahryggjum hér á landi og skilyrði fyrir innflutningi á lækkuðum tollum því ekki uppfyllt. Ráðherra óskaði því eftir við ráðgjafanefndina að hún endurmæti hvort raunveruleg þörf væri á að flytja inn lambahryggi. Niðurstaðan á að liggja fyrir í þessari viku.
Hægt að lækka toll ef gögnin reynast rétt
„Nú erum við að tala um að það séu tvær til þrjár vikur í slátrun þegar þetta kemur í ljós. Ég kalla þetta áhlaup frá versluninni á íslenska framleiðslu því þeir eru að flytja inn 55 tonn sem er gríðarlega mikið magn. Þetta er jafnvel upp undir 7% af þeim hryggjum sem eru framleiddir hér á landi,“ útskýrir Halla.
Hún segir sjálfsagt mál að lækka tollkvótann ef gögnin sem ráðgjafanefndin notast við séu rétt en bætir því við að nú séu komnar fram upplýsingar um að enginn skortur sé. Hún segist sjálf hafa verslað lambahrygg í Bónus í síðustu viku. „Birgjar vilja meina að það séu til hryggir í landinu og það þarf að fara yfir þau gögn.“
Sárt fyrir íslenska neytendur
Guðmundur Marteinsson, framkvæmdarstjóri Bónuss, sagði í gær að skorturinn hafi verið fyrirsjáanlegur síðan í vor þegar sláturleyfishafar hækkuðu verð vegna fyrirhugaðs skorts. Hann sagði það þó alvarlegast hversu mikið hefði verið flutt út af hryggjum á verðum sem íslenskum neytendum standa aldrei til boða.
„Manni sár og það svíður því þetta er jú ríkisstyrk og við erum að niðurgreiða þetta með sköttunum okkar,“ sagði hann í samtali við mbl.is.
Útflutningur á undirverði
Spurð hvort að sláturleyfishafar geti sjálfum sér um kennt vegna stöðunnar sem nú sé kominn upp segir Halla að sauðfjárræktun sé ekki þannig að það sé hægt að hlaupa til og slátra hvenær sem. En sláturleyfishafar þurfi samt sem áður að svara fyrir þennan útflutning.
„Það má alveg segja það að sláturleyfishafar verði að svara fyrir það. Þeir voru að flytja út hryggi í haust á undirverði sem er ekki nógu gott og má kannski segja að það hafi verið upptakturinn í þessu,“ segir hún en bætir við:
„En það er ekki orðinn skortur í landinu á hryggjum.“
Hún hefur ekki fengið nein viðbrögð við fundarbeiðninni enn sem komið er og ekkert hefur verið ákveðið með framhaldið. Þá hefur hún ekki rætt við Lilju Rafney Magnúsdóttur, þingmann Vinstrihreyfingarinnar – græns framboðs og formann atvinnuveganefndar.
Kvikan virðist nú skiptast til helminga
Hafa samþykkt kaup fyrir um 9,2 milljarða
Fjárfestingin 115 milljarðar króna
Markaðurinn hitnar og leiguverð hækkar hratt
Aukin tíðni þungunarrofa hjá yngsta aldurshópnum
Kveðst tala af virðingu: „Ég er enginn dóni“
Mikil skjálftavirkni á landinu áhyggjuefni